რის შესაძლებლობას არ იძლევა მუნიციპალიტეტების ვებგვერდები

There is no translation available.

დემოკრატიული ჩართულობის ცენტრში ახალი ვებგვერდის პრეზენტაცია შედგა. "ახალგაზრდა მეცნიერთა კლუბის" თავმჯდომარემ მინდია სალუქვაძემ თქვა, რომ "ოზურგეთის, ლანჩხუთის და ჩოხატაურის მუნიციპალიტეტებს აქვს თავიანთი ვებგვერდი, მაგრამ იქ საძიებო სისტემა არ არის ისე მოწყობილი, რომ ნებისმიერმა დაინტერესებულმა პირმა დროულად მოიპოვოს ინფორმაცია ანუ არაეფექტური საძიებო სისტემა აქვს". 

არის თუ არა მუნიციპალიტეტის ვებგვერდების საძიებო სისტემა ეფექტური და რა ჯდება ბიუჯეტიდან მისი შენახვა, ამის გასაგებად ჩვენ ოთხი მუნიციპალიტეტის წარმომადგენლებს დავუკავშირდით.

 

ქალაქ ოზურგეთის მუნიციპალიტეტის საკრებულოს და მერიას ერთი ვებგვერდი აქვს, რომლის დამზადება 4500 ლარი დაჯდა. ქალაქ ოზურგეთის მუნიციპალიტეტის საკრებულოს პრესსამსახურის უფროსის, გია ბაბილოძის თქმით, ვებგვერდი მაქსიმალურად დაცულია კიბერშეტევებისგან. "რადგან ჩქარ ტემპში შეიქმნა ჩვენი ვებგვერდი, საძიებო სისტემა ცოტა გაუმართავია, მაგრამ რაც ვებზე დევს, ყველაფრის ნახვა შეუძლია დაინტერესებულ პირს. ახლა მიმდინარეობს მუშაობა, უფრო დაიხვეწოს ვებგვერდი. ასევე, დაგეგმილი გვაქვს საკრებულოს ვებგვერდის შექმნა, რაც, სავარაუდოდ, მომავალ წელს მოხდება", _ გვითხრა გია ბაბილოძემ.

ჩოხატაურის მუნიციპალიტეტის გამგებელი ირაკლი კუჭავა ამბობს, რომ ახალი ვებგვერდის პრეზენტაციაზე მინდია სალუქვაძეს მუნიციპალიტეტებთან მომავალ თანამშრომლობაზე ესაუბრა და მას არ უსაუბრია მუნიციპალიტეტების ვებგვერდების არაეფექტურობაზე: "ჩვენ ვებგვერდის შენახვაზე წელიწადში ვხარჯავთ მხოლოდ 252 ლარს", _ გვითხრა ირაკლი კუჭავამ.

ოზურგეთის მუნიციპალიტეტის გამგეობის პრესსამსახურის უფროსის, ეკატერინე მგელაძისთქმით, "ოზურგეთის მუნიციპალიტეტის საკრებულოს ვებგვერდი შექმნილია 2006 წელს იმ დროს მოქმედი საკრებულოს წევრების მიერ. მუნიციპალიტეტი გვერდის შენახვისთვის წელიწადში 200 ლარს ხარჯავს _ ხდება მხოლოდ გვერდის მისამართის ე.წ. დომენის თანხის ჩარიცხვა. გამომდინარე იქედან, რომ ვებგვერდი ძველი შექმნილია და ტექნიკურ პროგრესთან ერთად, ვეღარ აკმაყოფილებს სტანდარტებს, ოზურგეთის მუნიციპალიტეტის გამგეობამ ახალი ვებგვერდის შესაქმნელად გამოაცხადა ტენდერი. გამოვლენილია ტენდერში გამარჯვებული კომპანია და უახლოეს მომავალში ოზურგეთის მუნიციპალიტეტს თანამედროვე სტანდარტების, მოქნილი საძიებო სისტემის მქონე მრავალფუნქციური ვებგვერდი ექნება".

ლანჩხუთის მუნიციპალიტეტის გამგეობის პრესსამსახურში კი ამ საკითხთან დაკავშირებით შემდეგი სახის კომენტარი გააკეთეს: "წლის განმავლობაში მუნიციპალიტეტის ოფიციალური გვერდის (http://lanchkhuti.org.ge/) შესანახად იხარჯება 420 ლარი. არ ვფიქრობ, რომ რაიმე ინფორმაციის მოპოვება ამ გვერდზე ძნელად იყოს შესაძლებელი _ საკმაოდ მარტივი საძიებო სისტემა აქვს. უახლოეს მომავალში დიზაინის განახლებას ვგეგმავთ".

"ახალგაზრდა მეცნიერთა კლუბის" წევრი და პროექტის ერთ-ერთი ავტორი ლევან მჟავანაძეამბობს, რომ ახალი ვებგვერდის შექმნის მიზანია მუნიციპალიტეტის მოსახლეობის საჯარო ინფორმაციაზე ხელმისაწვდომობის გაზრდა, საჯარო ინფორმაციის ეფექტური საძიებო სისტემის შექმნის გზით: "მუნიციპალიტეტების ვებგვერდების საძიებო სისტემები არ იძლევა შესაძლებლობას, მოძიებული იქნას ინფორმაცია ტექსტში არსებული სიტყვების მიხედვით, ჩვენ მიერ შემოთავაზებულ საძიებო სიტემაში შესაძლებელია ძებნა ტექსტში, ასევე, ძებნა სხვადასხვა პარამეტრების მიხედვით. ვებგვერდის საძიებო სისტემას ახლო პერიოდში დაემატება ახალი შესაძლებლობა, რაც საშუალებას მისცემს მნახველს, ინფორმაცია დროის შუალედის მიხედვითაც მოიძიოს. გარდა ამისა, აღნიშნულ ვებგვერდზე დაგეგმილია სხვადასხვა სახის საჯარო ინფორმაციის განთავსება, რომელსაც პერიოდულად გამოვითხოვთ თვითმმართველობებისგან. ამჟამად მიმდინარეობს ვებგვერდზე ინფორმაციის ატვირთვის პროცესი. თვითმმართველობების ვებგვერდების საძიებო სისტემები ჩვენ არ გაგვიკრიტიკებია, უბრალოდ, უფრო მოხერხებული საძიებო სისტემა შევთავაზეთ მოსახლეობას", _ გვითხრა ლევან მჟავანაძემ.

 

წყარო: http://gurianews.com/_/left_wide/41081_67_ka/ris_SesaZleblobas_ar_iZleva_municipalitetebis_vebgverdebi.html