ახალი ვებ-გვერდის www.Guria.ge პრეზენტაცია

2 აგვისტოს ოზურგეთის დემოკრატიული ჩართულობის ცენტრში ახალი ვებ-გვერდის პრეზენტაცია გაიმართა. www.Guria.ge – ზე მომხმარებელს გურიის მუნიციპალიტეტებიდან გამოთხოვილი დახარისხებული საჯარო ინფორმაციების ნახვა შეეძლება.

იდეა არასამთავრობო ორგანიზაცია „ახალგაზრდა მეცნიერთა კლუბმა“ პროექტის – „მოქალაქეთა ჩართულობის ხელშეწყობა ადგილობრივ თვითმმართველობაში“ ფარგლებში განახორციელა. ახალ ვებ-გვერდზე დადგენილებები, განკარგულებები, ბრძანებები, ბიუჯეტის შესრულების ანგარიში, სარეზერვო ფონდებიდან გამოყოფილი თანხების ხარჯთაღრიცხვა, საჯარო დაწესებულებების ხელმძღვანელების მიერ გამოცემული სამართლებრივი აქტები და სხვა საჯარო ინფორმაციებია განთავსებული.

ინფორმაციების განახლება ყოვლედღიურ რეჟიმში მიმდინარეობს. პრეზენტაცია „ახალგაზრდა მეცნიერთა კლუბის“ ხელმძღვანელებმა მინდია სალუქვაძემ და ლევან მჟავანაძემ გამართეს. „ეს იქნება საკმაოდ მოქნილი მექანიზმი, როგორც მოქალაქეებისთვის, ასევე საჯარო მოხელეების, ინვესტორებისა და სხვა დაინტერესებული პირებისთვის, რომლებიც ძალიან მარტივად მიიღებენ მათთვის სასურველ ინფორმაციებს. ჩვენ აქტიურად ვთანამშრომლობთ ადგილობრივ თვითმმართველობებთან, რომლებიც კანონით განსაზღვრულ ვადებში, ამომწურავ ინფორმაციებს გვაწვდიან. შემდეგ ეს მასალა ხარისხდება, ენიჭება სტატუსი და თავსდება Guria.ge – ზე.

მალე საჯარო ინფორმაციების გვერდი მუნიციპალიტეტების ოფიციალურ ვებ-გვერდებთან ინტეგრირდება,“- აღნიშნა მინდია სალუქვაძემ. შეხვედრას ოზურგეთის მუნიციპალიტეტის საკრებულოს თავმჯდომარე დავით დარჩია, საკრებულოს თავმჯდომარის მოადგილე დიმიტრი კვერღელიძე, საკრებულოს აპარატის უფროსი ნანა თავდუმაძე, გურიის გუბერნიის, მედიისა და არასამთავრობო ორგანიზაციების წარმომადგენლები დაესწრნენ.

წყარო: https://www.facebook.com/ozurgetimunicipalityboard/photos/?tab=album&album_id=683990698415745